ROXAS CITY – Kadungan sang pagselebrar sang National Nutrition Month subong nga bulan sang Hulyo nga may tema “Health diet gawing affordable for all” ginatutukan sang Provincial Health Office ang importansya sang nutrisyon para sa ika-ayong lawas sang isa ka indibidwal.
Sa interview sang Bombo Radyo kay Ms. Josephine Moises, Nutrition Officer III sang Provincial Health Office ginpahayag sini nga kinahanglan samtang ginadala pa lamang sang isa ka iloy ang iya bata sa iya tagu-angkan, magasugod na ini nga magkaon sang mga masustansya nga pagkaon partikular ang mga utan kag prutas.
Suno kay Moises, maayo ini bilang pagsugod agud mangin mapagros ang isa ka iloy subong man ang bata nga ginadala sini.
Mahibaluan nga ang Nutrition Month, ang nagatumod sa bulan kun sa diin ginahatagan sang pagtamod ang importansya sa pag-angkon sang mapagros, mapagsik kag maayo nga ikaayong lawas pinaagi sa pag-angkon sang balanse nga diyeta ukon diet kag masami nga pag-ehersisyo.
Sa nasambit nga bulan, may yara sang nagkalain-lain nga programa kag mga aktibidad ang naka-sentro sa nutrisyon.
Tinutuyo sini nga mahibaluan kag makabugtaw ang mga kabataan nga naga-eskwela sa importansya sang pag-angkon sang aktibo nga lawas.
Ba-se sa datos sang ahensya, 3,247 ang numero sang kabug-usan nga mga kabataan nga kulang sa kataason sadtong 2021 apang, nangnubo sang 2022 sa diin 2,026 na lamang, 911 naman ang mga maniwang kag nagnubo ini sa 545, pag-abot naman sa mga obessed nakarecord ang ila ahensya sang 1,624 kag nagnubo ini sa 1,335.
Ang nasambit nga datos ang nagikan sa mga kabataan nga naga-edad 5 ka tuig panubo.
Sa karun plano sang PHO Capiz nga ganyaton ang komunidad agud ipalapnag ang importansya sang nutrisyon sa lawas.
