ROXAS CITY – Ginakabig nga madinalag-on sang Tapaz Municipal Police Station ang ginkasa nga drug buybust operation sa Barangay Poblacion, Tapaz, Capiz.
Ini ang ginpahayag sang imbestigador sang Tapaz PNP nga si Police Senior Master Sergeant Rocer Garde sang mainterview sang Bombo Radyo Roxas.
Suno kay Garde nga wala sila nagauntat sa pagpatigayon sang kampanya kontra iligal nga droga.
Magluwas diri padayon man ang ila monitoring sa mga indibidwal nga nagaduso sang iligal nga droga sa ila banwa.
Mahibaluan nga nadakpan sang mga katapo sang Tapaz PNP ang magpakaisa nga lunsay mga balot vendor sa nasambit nga barangay sang amo nga banwa.
Ang mga nadakpan amo sanday Jerson Estim 31-anyos kag Jay-R Estim 25-anyos kag mga residente sang Barangay Daan Banwa sang nasambit nga banwa.
Ginpahayag ni Garde nga drug surrenderee si Jerson samtang si Jay-R naman ang newly identified drug personality.
Narekober sa possession sang magpakaisa ang anum ka mga plastic sachets nga ginapatihan shabu, P1,000 nga buybust money, 1 unit sang cellphone, 1 unit sang motorsiklo kag 1 ka wallet.
Sa karon nakahunong na sa karsel sang Tapaz Municipal Police Station ang nasambit nga mga drug suspect kag natalana nga pasakaan sang panumbungon nga paglapas sa RA 9165 ukon Comprehensive Dangerous Drugs Act of 2002.
