Nagtakop na ang kampanya sa Paris Olympics sang mga Filipina gymnast nga sanday Levi Ruivivar, Emma Malabuyo, kag Aleah Finnegan.
Napaslawan ang mga ini nga makasulod sa Top 24 sang artistics gymnastics nga ginhiwat sa Bercy Arena.
Nagpasakop ang tatlo sa Subdivision 3 kun sa diin nagsugod sa balance beam.
Nakakuha si Ruivivar sang 11.866 points, samtang may yara sang 11.466 points si Finnegan kag 12.233 points naman si Malabuyo.
Sa floor exercise, nakabaton sang 12.733 si Finnegan, may 13.100 si Malabuyo kag 12.433 naman si Ruivivar.
Sa vault naman, may yara sang 13.600 points si Ruivviar kag 13.266 si Malabuyo samtang si Finnegan ang may 13.383.
Nagtapos ang ila rotation sa uneven bars kun sa diin nakakuha sang puntos nga 12.500 si Malabuyo, samtang may 12.566 si Finnegan kag 13.200 naman si Ruivivar.
Nagakahulugan nga patas sanday Ruivivar kag Malabuyo sa pang-28 kag 29 nga kabug-usan nga puntos nga 51.099 samtang si Finnegan ang yara sa pang-33 nga may kabug-usan nga 50.498 points.
Ang Top 24 nga atleta lamang kag top 8 sa kada apparatus ang abanse sa Finals nga may yara sang tubtob duha nga atleta lamang kada pungsod ang mahimo ma-qualify.
Apisar nga napaslawan ang tatlo, nakapagkit ang mga ini sang kasaysayan bangud sa sulod sang 60 ka tuig, subong lamang liwat may pambato ang pungsod sa gymnast sa Olympics.
Sadtong 1964, nagpasakop sa Olympics sanday Evelyn Magluyan kag Maria-Luisa Floro.
