Ginalauman sang kampo ni anay Presidente Rodrigo Duterte nga magpaguwa sang desisyon ang International Criminal Court (ICC) sa ila interim release request sa sulod sang isa ka bulan.
Ginpahayag sang lead counsel nga si Atty. Nicholas Kaufman nga ang ICC dapat maghulag sang madasig base sa Rome statute.
Plano man sang depensa nga magpangayo sang pahanugot sa pag-file sang sabat sa argumento sang piskalya batok sa interim release ni Duterte, bangud sa gin-alegar nga pagsaylo sini sang pungsod nga gina-istaran.
Ginpanindugan ni Kaufman nga wala sia sing rason nga kwestyunon ang integridad sang mga hukom sang ICC, bisan pa nga ang ila pangabay nga i-disqualify ang duha ka hukom nga nadalahig sa nagligad nga drug war probe.
Gin-ako sini nga luyag kuntani sang kampo nga bisan temporaryo lang nga magbalik si Duterte sa Pilipinas, apang maathag nga indi ini pagbatunon sang gobyerno
Nagpamalibad man ini nga kumpirmahon ang report nga nagpamalibad ang Belgium kag Australia nga batunon si Duterte, sa diin ginpahayag sini nga may yara lamang sang confusion sa impormasyon.
Ginpamatukan man ni Kaufman ang suhestyon nga mahimo magpangayo sang legal protection si Duterte sa idalum sang kasuguan sang netherlands samtang yara sa kustodiya sang ICC–nagatumod sa suhestyon nga una nga ginsambit sang pila ka mga abogado nga Pilipino.
