Ginpamatukan sang kampo ni anay President Rodrigo Duterte ang hingyo sang prosekusyon sa International Criminal Court (ICC) nga usisaon ang mga gamit nga nakumpiskar sa tion sang iya pag-aresto.
Suno sa lead defense counsel nga si Atty. Peter Haynes, wala na sang rason nga usisaon pa ang mga amo nga items bangud dugay na ini yara sa kustodiya sang ICC Registry.
Ginpahayag man niya nga ang amo nga tikang mahimo lamang magpalawig sang proseso sang kaso.
Nagpamatok man ang depensa sa plano nga usisaon ang tanan nga mga yabi nga nakumpiskar kay Duterte
Suno sa ila, wala ini sang direkta nga kaangtanan sa kaso kag mahimo pa nga maglapas sa iya privacy.
Bangod sini, ginhingyo sang kampo ni Duterte sa ICC Trial Chamber III nga Hunyo 30, 2026 na lamang ang mangin katapusan nga adlaw sa pag-file sang bag-o nga mga mosyon sang prosekusyon may kaangtanan sa mga ebidensya.
