Gin-akusahan sang kampo ni Former President Rodrigo Duterte ang International Criminal Court (ICC) Prosecutors nga nagtuyo sang back-door appeal agud mabuhi liwat ang hurisdiksyon sang korte sa Pilipinas, bisan pa nga ginbungkag ini sang tuig 2019.
Sa anum ka panid nga dokumento nga ginsumiter sa ICC Appeals Chamber, ginrason sang lead counsel ni Duterte nga si Nicholas Kaufman nga gina-alegar ginatuis sang prosekusyon ang husto nga interpretasyon sang laye agud maremedyuhan ang kaugalingon nga kapaslawan nga maglunsar sang imbestigasyon samtang miyembro pa ang Pilipinas.
Suno sa iya, ang kapaslawan sa pagbukas sang imbestigasyon antes mag-atras ang isa ka pungsod sa ICC yara sa abaga sang Piskal.
Gani suno sa iya, dapat batunon sang Prosecutor nga indi matigayon ang accountability paagi sa pagtuis sang husto nga interpretasyon sang kasuguan kag indi ini dapat mag-prejudice sa kinamatarong sang suspetsado sa due process of law.
Ang nasambit nga dokumento ang hingyo sang kampo ni Duterte agud magsabat sa bag-o lang nga mga argumento sang prosekusyon nga nagahangkat sa hurisdiksyon sang ICC.
Pahayag pa ni Kaufman, ang prosekusyon padayon nga nagapangatarungan nga ang ICC mahimo mag-assert sang iya hurisdiksyon bisan pa nga ang isa ka pungsod nag-atras gikan sa Rome Statute, walay sapayan sang nauna nga desisyon sang Pre-Trial Chamber nga ang korte mahimo nga wala na sang hurisdiksyon kon ang isa ka estado nga partido indi na isa ka partido sa statute sang ginsugdan sang Piskal ang imbestigasyon.
