Nag-atubang na sa International Criminal Court (ICC) ang kampo ni former President Rodrigo Duterte agud pamatukan ang hingyo sang piskalya nga usisaon ang mga items nga nakumpiska sa tion sang pagdakop sa iya nga gintawag nila nga “fishing expedition” ukon pagpangita sang ebidensya nga wala sang bastante nga basehan.
Suno sa lead defense counsel nga si Atty. Peter Haynes, madugay na nga yara sa kustodiya sang ICC Registry ang mga items apang luyag na lang ini nga usisaon sang piskalya subong, apisar nga kumpirmado na ang mga panumbungon batok kay Duterte, bagay nga suno sa iya makapaatrasar lamang sa trial.
Ginpakalain man sang depensa ang hingyo nga usisaon ang tanan nga mga liyabe nga nakumpiska kag nagapanindugan nga wala ini sang maathag nga koneksyon sa kaso kag mahimo pa nga maglapas sa privacy sang mga himata ni Duterte.
Bilang resulta, ang depensa nagpangabay sa ICC Trial Chamber III nga ibutang ang Hunyo 30, 2026 bilang deadline para sa bisan ano nga bag-o nga mga mosyon sa prosekusyon nahanungod sa mga ebidensya sa ICC Registry.
Tinutuyo sang kampo ni Duterte nga malikawan ang dugang nga delay sa preparasyon sa palaabuton nga trial.
