Ginhingyo sang kampo ni anay Presidente Rodrigo Duterte sa International Criminal Court (ICC) nga magpreparar sang independent medical report agud pamatud-an nga wala na siya sang physical ukon cognitive capacity nga magpalagyo ukon mag-upang sang hustisya.
Suno sa mosyon nga gin-file sang Disyembre 19, ginpanindugan sang depensa nga nagalala ang ikaayong lawas ni Duterte, base sa report sang independent medical panel nga naglaragway sa iya nga tigulang, maluya, kag may unexplained weight loss.”
Ginahingyo sang depensa sa Pre-Trial Chamber nga manduan ang Medical Panel nga usisaon kon ang subong nga cognitive condition ni Duterte nagapahanugot sa iya nga magpalagyo, magpahug sa mga testigo, ukon magkomiter sang krimen.
Ginhatagan man pagtamod sang depensa nga wala gintugutan si Duterte nga mag-intra sa bisan ano nga court status conferences, nga makabulig kuntani sa mga hukom sa pag-usisa sang iya kahimtangan.
Ini nga pangabay gin-file sa pihak sang nauna nga pag-usisa sang isa ka independiente nga medical panel nga naghinakop nga, bisan pa nga “mahuyang kag tigulang,” si Duterte nagakabagay gihapon nga mag-intra sa mga kaso sa korte may kaangtanan sa mga kaso sang crimes against humanity sa tion sang iya war on drugs.
