Naghatag sang reaksyon ang isa ka barangay official sa petition nga gin-file sa Supreme Court nahanungod sa pagpostpone sang Barangay kag Sangguniang Kabataan Elections ukon BSKE 2026.
Sa interview sang Bombo Radyo kay Punong Barangay Erwin Oroceo sang Barangay Baybay, Roxas City, iya ginpahayag nga kun ma-postpone man ukon indi ang BSKE 2026, ang importante amo nga sundon ang layi kag ang ano man nga desisyon parte sa eleksyon.
Suno pa sa iya, wala siya sang ginapaboran kun ma-postpone ukon indi ang eleksyon, bangod may maayo kag indi maayo nga epekto ang duha ka sitwasyon.
Kun ma-postpone ang eleksyon, pabor ini sa mga incumbent officials, ilabi na sa mga yara na sa ila katapusan nga termino, bangod may dugang pa sila nga tion sa pagserbisyo sa ila barangay.
Apang, mahimo man ini nga negatibo para sa mga nagaplano magpadalagan sa pagka-barangay official, bangod madulaan sila sang kahigayunan nga makapapili sa eleksyon.
Pahayag pa ni Oroceo, may mga barangay officials nga may maayo nga nahimo sa ila barangay kag mahimo ini nga lantawon bilang maayo nga epekto sang pagpostpone.
Pahayag pa niya, ang pinakaimportante gihapon amo ang desisyon sang mga tawo, bangod sila ang magadesisyon kun sin-o ang gusto nila nga magserbisyo bilang barangay officials.
Sa karon, ginpahanumdom ni Oroceo nga ano man ang mangin desisyon parte sa BSKE 2026, ang kabubut-on sang mga pumuluyo kag ang pagsunod sa layi amo gihapon ang dapat mangin basehan.
