Pormal na nga nagpasa si Vice President Sara Duterte sang iya sabat pinaagi sa iya abogado nga si Atty. Michael Poa sa Senado bilang impeachment court.
Bitbit sang grupo ang lima ka maleta nga nagaunod sang mga dokumento kag sabat ni Duterte kaangot sa mga artikulo sang impeachment nga gin-file batok sa iya.
Ang mga dokumento ang nagaunod sang mga depensa ni Duterte lakip na ang constitutional issue, procedural, kag substantive nga may kaangtanan sa Articles of Impeachment, subong man ang nangin proseso sang House of Representatives kag Committee on Justice.
Suno sa kampo, ang sabat ang gin-file “without prejudice” sa mga isyu sa konstitusyon nga naka-pending pa sa Korte Suprema.
Dugang pa nga ginpanindugan sang depensa nga mas maayo nga istoryahan kag resolbahon ang amo nga mga isyu sa sulod sang Impeachment Court, sa baylo nga ipaguwa ini sa publiko ukon sa media.
Nagasalig man ang ila kampo nga tumanon sang Senado ang iya katungdanan bilang Impeachment Court nga may katarungan, kahilwayan, kag hugot nga pagsunod sa rule of law.
