Ginkwestyon sang kampo ni Vice President Sara Duterte ang pagpanubo sang voting threshold sa impeachment trial, bangud suno sa ila mahimo ini magdul-ong sa isa ka conviction nga indi base sa nauna nga 16-vote requirement.
Suno kay Duterte spokesperson Atty. Paolo Panelo, maathag sa Konstitusyon nga kinahanglan ang two-thirds concurrence sang tanan nga miyembro sang Senado para sa conviction, nga katumbas sang 16 ka boto sa 24 ka mga senador.
Ginpanindugan ni Panelo nga indi dapat automatic nga mabuhinan ang denominator bangud lang wala ukon indi makapartisipar ang pila ka mga senador.
Suno sa iya, nagapabilin sila nga katapo sang senado tubtob nga may yara sang legal nga bakante sa ila mga pulungkuan.
Nagpaandam man si Panelo nga ang pagbag-o sa voting threshold mahimo nga may mas malapad nga epekto sa interpretasyon sang iban pa nga constitutional voting requirements sa palaabuton.
