ROXAS CITY-Ginkompirmar sang tagpamaba sang Miss Universe Philippines-Capiz nga nagpaiway sa pagpasakup sa Miss Universe Philippines 2020 pageant ang kandidata sang probinsiya sang Capiz.
Ginpahayag ni Charly Gonzales Distor nga ginkakibot sini nga nagresign ang kandidata sang Capiz nga si Mariam Lara Ashraf El Hamid kag nagpaiway nga magpasakup sa amo nga pageant.
Suno sa kay Distor nga ginpakamaayo sang MUP-Capiz nga indi pag-ibutang sa risgo ang kandidata nga malatnan sang COVID-19 matapos nga may yara sang isa ka kandidata nga nagpositibo sa amo nga sakit.
Gindugang pa ni Distor nga madamo naman sang mga pictorials sang amo nga pageant nga wala na matambongan ni Mariam sa Metro Manila.
Magluwas diri may yara man sang personal nga rason ang kandidata sa pagpaiway sini sa pagpasakup sa amo nga pageant.
Kalakip sa mga personal nga rason sini amo pagsugod na sang iya nga trabaho sa isa ka BPO company bangud ginakabig ini nga breadwinner sang ila pamilya kag luyag sini nga padayunon ang iya nga pagtuon.
Ginkasubo ni Distor ang pagback-out sang kandidata bangud nakita sini nga may yara sang potensyal si Mariam apang wala ini sang may mahimo kundi respetohon ang desisyon sini.
Samtang ginpanginwala man ni Distor ang alegasyon nga ginpabay-an sa Mariam sang provincial government rasun nga nagback-out ini.
Suno sa kay Distor nga ginhatagan ini sang kapin P50,000 nga kuwarta ni Capiz Governor Esteban Evan Nonoy Contreras para sa iya nga mga galastusan sa nasambit nga pageant.
