DAO CAPIZ – Ginatudlo sa karun sang magapadalagan bilang alkalde sa banwa sang Dao nga si Mr. EJ Griño ang utod ni Mayor Jose “Jimbo” Barruela nga ginpatup-an ini siya sang inumol sa dughan kag nagbuhi pa sang mga malain nga tinaga sang tinalikdan nga semana.
Sa interview sang Bombo Radyo kay Griño, ginsiling sini nga sadtong Oktobre 11, Biyernes nga adlaw takna alas 5:30 sang hapon sang yara ini sa shop sang iya abyan nga nagpakay-o sang iya motorsiklo naglabay ang utod ni Barruela nga si “Dodoy” apang wala ini niya nga ginsapak.
Apang gulpi na lang ini nga nagbalik kag may kaupod na nga duha ka mga body guard ni Barruela kag gulpi na lang ini siya nga ginbungguan sang iya ginasakyan nga motorsiklo.
Sa iya nga pagdumdum nga nagatiaw lamang ini apang ginliwat pa sang utod ni Barruela nga bungguan ini kag didto naigo ang iya baba nga nagresulta sa pagkadugo.
Bangud sini, iya ini nga ginkompronta apang dako ang iya kakibot sang ginpalibutan na ini sang duha ka mga body guard kung sa diin ang isa yara sa iya likod kag ang isa naman yara sa iya unahan.
Magluwas diri, nagbuya pa ini suno diri sang tinaga nga “ginkawatan niya sini ang ila sobre sadtong tinalikdan nga eleksyon” apang wala niya ini ginsapak kag sa pagkamatuod suno kay Griño nga nagapalayo na ini apang ginkakibot niya sang gin-uyatan ini siya sang bodyguard sa iya abaga agud indi makahulag kag didto ini ginpusdakan sang sumbag sa dughan sang utod sang alkalde.
Mahibaluan nga sang natabo ang insidente, ginphayag ni Griño nga yara sa impluwensya sang makahulubog nga ilimnon ang utod ni Barruela.
Bangud sa natabo nagapati si Griño nga pamulitika ang sa likod sini bangud sang matabo ini isa ka semana matapos ang iya file sang certificate of candidacy sa pagka-alkalde.
