Ginsabat sang pinuno sang Provincial Engineering Office ang nangin komento ni Mayor Leodegario ‘’Jun’’ Labao Jr. sang Mambusao nga ginabasol ini sa nangin kapabayaan sang kontraktor sa road rehabilitation project sa Barangay Ilaya, Pontevedra, Capiz.
Suno kay Engr. Edgar Agana nga indi siya ang dapat basulon kun nangin pabaya ang kontraktor bangud nahibaluan sini ang iya obligasyon sang ginbaton ang proyekto.
Ginpahayag sang opisyal nga bilang provincial engineer may obligasyon kag responsibilidad ini nga iya ginahimo sang ensakto.
Ginpalab-ot man ni Agana kay Labao nga posible nalimtan sang alkalde nga si Governor Esteban Evan Contreras II ang iya nga boss kag wala na sang iban.
Gin-athag ni Agana nga bilang pamatood nga ginahimo sini ang iya trabaho, ginrekomendar sini sa gobernador ang pagterminate sa kontrata sang nasambit nga contractor, matapos nakita sa ginasumiter nga physical report ang kapabayaan sa proyekto.
Nahibaluan nga Pebrero 15 sang ginhatagan sang ultimatum ang contractor nga magpadulong sa talatapan sang Provincial Engineer’s Office agud maestoryahan kun ano ang plano sini sa road rehabilitation project nga ila gina-uyatan.
Apang napaslawan nga magpakita ang natungdan rason nga ginrekomendar sini ang termination of contract.
