Coffee lover ka man bala? Ano gusto mo may gatas ukon cream ukon brewed lang?
Pero nakatilaw kana bala sang kape nga cheese ang ginabutang?
Didto sa northern region sang Sweden, cheese ang ginabutang sa mainit nga kape.
Isa ka tradisyonal nga ilimnon ang “kaffeost” ukon kape nga ginabutangan sang “Leipäjuusto” ukon bread cheese nga gina-utod sa cubes.
Ang bread cheese ang halin sa gatas sang baka. Mahumok ini, matam-is, kag may spongy texture.
Bangud sang iya texture, madasig ini nga matunaw sa kape pagkatapos sang pila ka minutos kag ang resulta, mangin creamy, apang may halo nga katam-is kag kaasin ang sabor nga halin sa cheese.
Ginapahayag nga pinaagi sa pinasahi nga kombinasyon sang kape kag cheese, magabulig ini sa pagdugang sang sodium sa lawas sang tawo Naghatag man ini sang dugang nga kainit kag kusog sa tion sang ila malawig nga panglakaton sa matugnaw nga palibot.
Sa subong, popular ang kaffeost sa mga balaligyaan sang kape sa mga syudad sang Sweden kag bisan sa iban nga bahin sang Scandinavia.
