ROXAS CITY – Indi upang ang kapigaduhon sa baylo nangin inspirasyon ini sa tatlo ka mag-ulutod nga dululungan nga nakapasar sa Licensure Examination for Professional Teacher, agud malab-ot ang ila handum sa kabuhi.
Sa interview sang Bombo Radyo sa mag-ulutod nga sanday Cyndie kag Warren Irisari, ginpakigbahin sang mga ini ang ila mga naagyan sang tion nga sila ang naga-eskwela pa lamang tubtob sa ila nangin eksperyensya sa pagkuha sang exam kag makapasar.
Suno sa mag-ulutod, sa pihak sang mga pagtilaw nga naga-abot sa ila ululupod nila ini nga gin-atubang kag nasolusyunan.
Bangud sa kapigaduhon ilabi na pag-abot sa pinansyal, nagpangita sila sang mahimo nga makuhaan sang extra nga palangitan-an kung sa diin ginsulod nila sa ila oras ang pag-choreography ukon pagtudlo sang mga saot.
Apisar nga makapoy kag suok sa ila nga oras sa pag-eskwela, gintinguhaan nila ini bangud dako ang mabulig sa ila agud mabuhinan ang kabudlay sang ila ginikanan sa pagtimakas nga makakita sang ila mga allowance.
Mahibaluan nga sanday Rose, Cyndie kag Warren ang tumandok snag banwa sang Sapian, kag nagradwar sa kurso nga Bachelor of Physical Education sa Capiz State University Main Campus.
Bangud sa kakulangan sa budget, wala na ang mga ini natigayon nga mag-enroll sa review center sa baylo ginpakamaayo na lamang nila nga magself review.
Aminado man ang mga ini nga nakabatyag sila sang kahisa sa iban nila nga mga ka-batch bangud sa ila ginapakigbahin nga mga eksperyensya sa review center apang wala ini nangin rason agud indi sila magtutok kag magtuon sang mayad agud makapasar sa board exam.
Naglab-ot lamang suno diri sa duha ka bulan ang ila nangin preparasyon kag indi nangin basta-basta ang ila mga na-agyan nga mag-ulutod.
Bangud sa ila nalab-ot subong, dako ang ila pagpasalamat sa Ginuo, pamilya, mga abyan, kag mga maestra kag maestro nga nagbulig kag naghatag sang bilog nga suporta sa ila sa umpisa pa lamang.
Mensahe nanday Cyndie kag Warren sa mga estudyante, itugyan ang tanan sa Ginuo kag magsalig sa kaugalingon kag himuon nga inspirasyon ang estado sa kabuhi subong man ang mga tawo nga wala sang salig ilabi na ang nagapabatyag sang negatibo nga panan-aw.
