Kapin 1,500 ka bakante nga trabaho ang ginbukas para sa mga Persons with Disabilities (PWDs) sa Job Fair 2026 nga ginpatigayon sang Hulyo 21 sa Hall of Governors sang Capiz Provincial Capitol, bilang kabahin sang pagsaulog sang ika-48 nga National Disability Rights Week.
Suno sa Capiz Public Employment Service Office (PESO), siyam ka pribado nga employers ang nagpartisipar sa job fair kag nagtanyag sang 55 ka nagkalain-lain nga posisyon.
Luwas sa job opportunities, nagpatigayon man sang mga lecture, orientation kag skills training para sa mga partisipante, lakip ang pagtalakay sa mga kinamatarung sang mga PWD sa trabaho, DOLE Integrated Livelihood Program, DSWD Sustainable Livelihood Program, kag TESDA short skills training.
Sa iya mensahe, ginpabutyag ni Governor Fredenil H. Castro nga ang kakulangan sa lawas indi dapat mangin balabag sa pag-angkon sang pangabuhi kag kadalag-an.
Suno sa gobernador, ang mga PWD nagapakita sang kabaskog, determinasyon kag padayon nga pagpaninguha bisan pa sa mga kabudlayan.
Ginpahayag man ni Castro nga maga-alokar ang Gobyerno Probinsyal sang tunga sa ₱2 milyon tubtob ₱3 milyon para sa mga programa nga magahatag sang dugang nga pangabuhian kag suporta sa mga Persons with Disabilities sa probinsya.
