JAMINDAN, CAPIZ – Nagabalor 2.3 milyones pesos nga proyekto ang nabaton sang lokal nga gobyerno sang Jamindan kasunod sang ila pagbaton sang pasidungog sang Department of Interior and Local Government (DILG) nga ginpatigayon sa Manila Hotel.
Sa interview sang Bombo Radyo kay Mayor Mac Arthur Valdemar, ginpahayag sini nga ila siguruhon nga may pagakadtuan ang ila nabaton nga pondo kag maka-benepisyo ang mga pumuluyo sang banwa sang Jamindan.
Ginapabugal man sini ang ila nabaton nga pasidungog bangud ini ang labing una nga kahigayunan nga ginkilala sang ahensiya ang lokal nga gobyerno sang banwa.
Ginpahayag sini nga ang kadalag-an sang lokal nga gobyerno sang banwa ang kadalag-an man sang mga pumuluyo bangud sa ila hugot nga kooperasyon ilabi na sa ginapatuman nga mga programa sa banwa.
Mahibaluan nga ang SGLG ang isa ka programa sang DILG kun sa diin ginakilala ang maayo kag tampad nga pagdumala sang isa ka local government unit (LGU).
Kalakip sa nangin criteria sang DILG sa pagtumod sang mga awardees amo ang Good Financial Administration; Disaster Preparedness; Social Protection; Peace and Order; Business Friendliness and Competitiveness; Environmental Protection; kag Tourism Culture and the Arts sang isa ka LGU.
