ROXAS CITY – Yara sa masobra 200 ka mga kasuldadohan ang magapartisipar sa Local Absentee Voting nga pagahiwaton buwas nga adlaw, Abril 28 sa ila kampo sa 3rd ID Gym sa Camp General Macario Peralta, banwa sang Jamindan.
Ini ang ginpaghayag ni Capt. Kim Apitong, tagpamaba sang 3rd Infantry Division sang Philippine Army sang ma-interview sang Bombo Radyo.
Suno kay Apitong, nga madamo sang ila miyembro ang nagparehistro sa local absentee voting sa nagkalain-lain nga kampo sa Western Visayas.
Ginpahayag man sini nga isa siya sa mga nagparehistro bangud indi siya tumandok sang Capiz.
Sa pihak nga bahin, ginpahayag man ni Apitong nga padayon ang ila monitoring sa mga area of concerns nga posible may presensya sang mga rebelde nga grupo kag padayon man ang ila combat operations.
Ginsiguro man sini, nga pagahimuon nila ang tanan kaupod sang pila ka agency task force ang ila masarangan agud mapabilin nga luwas kag hilway ang pagahiwaton nga Local kag National elections.
