CUARTERO, CAPIZ – Pilason ang kapin 30 ka mga indibidwal sa nagluntad nga bungguanay sang closed van kag ceres bus sa Barangay Poblacion Ilaya, Cuartero , Capiz.
Ang driver sang ceres bus amo si Nilo Estorque Etiong, 43-anyos, ag residente sang Barangay Matagnop, Dao, Capiz.
Samtang ang driver sang closed van amo naman si Evert Brozas Estrelles, 38-anyos kag temporaryo nga naga-istar sa Barangay Man-it, Passi City, Iloilo.
Sa interview sang Bombo Radyo kay Punong Barangay Jojo Mayo sang Barangay Poblacion Ilawod, iya ginpahayag nga nakabati ini sang matunog nga paglagubo kag sa pagguha sini, iya na nga nakit-an ang wasak nga ulo sang ceres bus malapit sa iya nga puluy-an.
Suno kay Mayo, gilayon man ini nga nagtawag sang responde agud mabuligan ang mga pasahero.
Bangud sang makusog nga impact sang pagbunggo, naka-angkon sang pilas kapiun 30 ka mga pasahero lakip na ang mga driver nga gindapatan sang first aid kag gilayon man nga ginpadangat sa ospital.
Nahibaluan nga ang closed van ang gikan sa probinsya sang iloilo kag pakadtu na sa syudad sang Roxas samtang ang ceres bus naman ang gikan na sa syudad sang Roxas kag padulong na kuntani sa Iloilo sang matabo ang insidente.
Sa subong, ginkuha na sang Ceres Liner Rescuer ang naaksidente nga ceres bus samtang nagapabilin sa gihapon sa lugar ang closed van.
Nagpanawagan man ang natungdan sa publiko ngs maghalong gid sa pagmaneho sang dalan kag masami gid nga i-tsekyar ang mga motor ukon salakyan antes magbyahe agud malikawan ang nasambit nga insidente.
INTERVIEWED BY: BOMBO RONNIE PREGUA JR.
