ROXAS CITY – Masobra 30 ka mga panimalay nga yara sa higad sang suba sa apat ka mga barangay sa banwa sang Panit-an ang ginpasaylo na sang Local Government Unit (LGU) bangud nakita nga masyado na ka delikado nga istaran ang amu nga lugar bangud nagakatiphag ang duta.
Sa interview sang Bombo Radyo kay Mayor Katherine Kit D. Belo, ginpahayag sini nga ila ginatutukan ang nasambit nga problema kag nagapangayo sila sang bulig sa mga national agency kasubong sang Department of Public Work and Highways kag National Housing Authority.
Suno pa diri, nga indi na dapat ini pagpaawat-awatan bangud nagakabalaka siya sa tion nga may yara sang pag-ulan kun sa diin nagadugang ang pag-ab-ab sang duta.
Ginpahayag man sini nga ginsilingan na nila ang mga pamilya nga apektado nga temporaryo nga magtinir sa ila himata tubtob nga wala pa sila sang balay nga pagahalinan.
Dugang pa sang alkalde nga nagpakig-angot na sila sa national housing authority agud mabuligan ang mga pamilya nga apektado.
Sa karun, ginatinguhaan sang LGU nga masabat ang ini nga problema agud mapalayo man sa katalagman ang mga pumuluyo.
