Kapin sa 30 ka testigo ang ginapaabot nga ipresentar sang House prosecution panel sa impeachment trial batok kay Vice President Sara Duterte.
Suno kay Gerville Luistro, nga amo ang lead prosecutor kag presidente sang House Committee on Justice, ginpalapad nila ang listahan sang mga testigo samtang ginpasaka ang ila pre-trial brief sa Senate Impeachment Court.
Ginpahayag ni Luistro nga gindugangan nila ang listahan agud masiguro nga maipresentar ang tanan nga importante nga testimonya.
Suno sa iya, base sa mga pirma, ang mga testigo nga wala malakip sa pre-trial brief mahimo nga indi na pagtugutan nga magtestigo sa nagahilapit nga trial.
Apang ginpaathag naman nila ni Ysabel Maria Zamora nga ginatugutan sang impeachment rules nga indi anay pag-pangalanan ang iban nga mga testigo kag dokumento para sa ila seguridad kag kaluwasan, basta mahatag ang nagakaigo nga deskripsyon sang ila katungdanan kag sang katuyoan sang ila testimonya.
Lakip sa ginapaabot nga ebidensya sang prosecution ang mga opisyal sang gobyerno kag mga record sang bangko agud suportahan ang mga alegasyon sang wala maathag nga manggad ukon unexplained wealth kag ginapatihan nga indi ensakto nga paggamit sang confidential funds.
Natalana nga himuon sang Senado ang pre-trial conference sa Hunyo 18, samtang pormal nga magsugod ang impeachment trial sa Hulyo 6.
