Naglab-ot na sa 471 ka mga buluthuan sa probinsya sang Capiz ang nagsuspendi sang ila face-to-face classes umpisa Hulyo 16 tubtob Hulyo 18, bangud sa padayon nga pag-ulan dala sang bagyong Crising.
Sa interview sang Bombo Radyo kay Ini Ms. Glenda Marie Botin, Project Development Officer II sang Disaster Risk Reduction and Management (DRRM) sang DepEd Capiz, ginapahayag niya nga base sa datos, 391 ka elementary schools, 54 ka high school kag 26 ka integrated schools ang temporaryo nga nagsira sang ila physical classes bilang kabahin sang pagpaandam sa epekto sang panahon.
Bangud nga wala sang in-person classes, ang mga buluthuan nagahimo sang pagbalhin sa Alternative Delivery Mode (ADM) agud mapadayon gihapon ang pagtudlo sa mga estudyante bisan pa sa masamig nga panahon.
Suno kay Botin, ang kahimtangan sang tagsa ka eskwelahan padayon nga gina-monitor kag ginareport sa Schools Division Office (SDO) sang Capiz, kag ginakoordinar man sa Division Superintendent agud mapasiguro nga may husto nga impormasyon kag pahanumdum sa tanan nga apektado.
Sa karon, wala pa sang ginreport nga danyos sa mga pasilidad ukon insidente sa mga personnel sang DepEd Capiz nga may kaangtanan sa pagbaha ukon pag-ulan sa probinsya sang Capiz.
