Ginpatpat sang talatapan sang Traffic Management Unit Roxas City ang record sang mga motorista kag colorum tricycle drivers nga nagkaladakpan bangud sa paglapas sa layi sang trapiko sa anum ka bulan sang 2025 halin Enero tubtob Hunyo.
Sa interview sang Bombo Radyo kay Mr. Gonzalo Andrada Jr., Head sang Traffic Management Unit Roxas City, iya ginpahayag nga ang nagkaladakpan ang ginakalakipan sang mga motorista nga wala nagasuksok sang helmet, driving without license kag mga colorum tricyle drivers nga may problema sa ila sini nga mga permits.
Humalin sang bulan sang Enero tubtob Hunyo 2025, yara sa kabug-usan 310 ka mga motorista ang nadakpan sa paglapas sang ‘No Helmet, No Driving Ordinance’, kun sa diin ang mga backrider ukon driver amo ang nagalapas. Samtang, ang iban nga mga nadakpan nga naglapas sa amo nga ordinansa ang wala man sang lisensya ukon ‘driving without license’ nga nagdangat sa 206 ang mga nagkaladakpan. Apang, wala man suno diri sang may nakasuhan sa amo nga mga bayolasyon bangud sa nagakabayaran man ang mga nagakaigo nga penalties.
Sa pihak nga bahin, yara man sa 224 ka mga colorum tricycle drivers ang nagkaladakpan sa amo man nga mga binulan sa diin nga ginganyat sini ang mga commuters nga kun mahimo magsakay lang sa mga lehitimo nga mga tricycle ukon ang may mga city number agud nga makalikaw sa kun ano man snga sahi sang indi maayo nga hitabo kaangay sang pila nga mga reklamo sa ila nga palapaw sa pagsukot sa pamasahe kag kun makaisa may mga pagkabutang nga nagakabilin nga indi na mabalik.
Nahibaluan nga para sa mga pasaway nga mga colorum drivers, may yara sang nagakaigo nga mga penalidad para sa ila kun sa diin sa 1st offense ang nagabalor sang P1,500, sa 2nd offense P3,000 kag sa 3rd offense naman nagabalor sang P5,000.
Nahangpan man suno sini ang mga colorum nga nagapanginyawat nga maka-income apang ginaganyat sini ang mga commuters nga likawan nalang ang pagsakay sa mga ini agud nga dalayon nga madula sila para nga wala na suno sa iya sang may matuntuhan nga pila ka mga commuters kag madasig nga makapalb-ot sang reklamo ang mga tagreklamo bangud sa kun sa may mga city number lang sila magsakay.
Ginsaysay man sang hepe sang TMU nga nagdangat sa 262 ang nadakpan nga mga motorista nga wala nagasunod sa traffic signs, gikan Enero tubtob Hunyo sa diin nagapanawagan ini sa mga motorista nga mangin responsable sa pag-parking, ilabi na kung may mga traffic signages sa lugar.
Sa katapusan, nagpangabay si Andrada sa mga motorista nga mag-halong sa pag-drive agud malikawan ang mga aksidente kag pagbungguanay kag nagpasalamat man ini sa mga katapo sang TMU Roxas City nga aktibo nga nagamanihar sang daloy trapiko agud mahatagan ang tagsa ka mga motorista sa syudad sang katawhayan sa karsadsa, kag nagapanawagan sang kooperasyon sang tanan para sa seguridad sang tagsa-tagsa.
