Ginabulubanta nga 68.43 milyones ka mga Pilipino ang magaboto subong nga Lunes agud magpili sang bag-o nga liderato sa pungsodnon kag lokal nga eleksyon suno sa Commission on Elections (Comelec).
Suno sa record, nagalab-ot sa 4.3 milyones ka mga Pilipino ang magaboto sa labing una nga kahigayunan sa sini nga tuig nga national elections.
Ginpahanumdom sang Comelec ang mga botante nga magtipon sang listahan sang mga kandidato nga ila botohon.
Para sa national position, tubtob sa 12 ka mga senador kag isa ka party-list ang sarang mapilian samtang para sa lokal nga posisyon, lakip sa mga pililian nga pagabotohan amo ang kongreso, gobernador, bise-gobernador, mga katapo sang provincial board, alkalde, bise-alkalde, kag mga konsehal (depende sa syudad ukon banwa).
Antes ang eleksyon, ang mga botante dapat makabaton sang Voter’s Information Sheet (VIS) nga nagaunod sang importante nga mga detalye pareho sang presinto, voting center, kag sample ballot. Mahimo man nga gamiton ang Comelec Precinct Finder online agud makita ang eksakto nga polling place.
Oras sang pagboto:
- Regular nga mga botante: 7:00 a.m. tubtob 7:00 p.m.
- Senior citizens, PWDs, nagabusong, kag ila mga kabulig: mahimo magboto sumugod alas 5:00 sang aga.
