ROXAS CITY – Nag-abot na ang 906 tanan ka mga Vote Counting Machine (VCM) nga pagagamiton sa palaabuton nga eleksiyon sa Mayo 9, 2022 kalakip na diri ang mga ballot boxes kag batterries nga pagahimuon nga back-up sa tion nga may yara sang power interruption nga matabo.
Ini ang ginpahayag ni Mr. Louell Firmalino, tagpamaba sang Comelec-Capiz sang ma-interview sang Bombo Radyo.
Suno kay Firmalino, nga magahiwat sila sang final testing and sealing sa mga VCM sa tanan nga polling precinct sa Mayo 3 tubtob Mayo 7 kun sa diin ginakumbensi man sini ang mga pumuluyo nga magtambong kun patigayunon na ini agud makita nga wala sang tampering sa mga VCM.
Samtang, ginahulat pa nila ang dugang nga mga materials para sa canvassing kit nga natalana naman nga magaabot subong nga semana.
Dugang pa sini, nga preparado na ang Comelec sa palaabuton nga national and local elections.
Sa pihak nga bahin, pag-abot naman sa lokal absentee voting, ginakabug-usan ini sang mga Media, PNP, AFP, kag mga empleyado sang Comelec kun sa diin pagahiwaton ini sa Abril 27 tubtob 29.
Sa karun, wala pa sila sang pinal nga listahan kun pila ang numero sang mga nag-apply para sa local absentee voting kag padayon pa ang ila pagkolekta sang mga magapakigbahin sa absentee voting diri sa probinsya sang Capiz.
