Ginalauman sang Department of Education (DepEd) Region 6 nga magalab-ot sa malapit isa ka million ang numero sang mga enrollees sa Western Visayas para sa School Year 2026-2027.
Sa interview sang Bombo Radyo kay Mr. Hernani Escullar Jr., Regional Information Officer sang DepEd Region 6, iya ginpahayag nga padayon pa ang pagbaton sang mga buluthuan sang mga enrollees antes ang opisyal nga pagbukas sang klase.
Suno kay Escullar, sa nasambit nga numero nagalakip ini sang mga estudyante sa pampubliko kag pribado nga mga eskwelahan lakip na ang Local Universities and Colleges (LUCs) sa rehiyon.
Dugang pa niya nga kadungan sang enrollment, padayon man ang pagpatigayon sang Brigada Eskwela sa nagkalain-lain nga mga buluthuan agud masiguro nga limpyo kag preparado ang mga eskwelahan para sa pag-abot sang mga estudyante.
