DUMARAO, CAPIZ- Nagdangat sa kapin P2 million nga balor sang shabu ang nakumpiskar sa apat ka mga persona sa ginkasa nga drug buybust operation sang mga kapulisan sa Barangay Astorga, Dumarao, Capiz.
Ang mga arestado amo sanday alyas ‘Owaw’, 44-anyos, subject person, alyas ‘Noel’, 62-anyos, alyas ‘Cecil’, 45-anyos nga lunsay residente sang nasambit nga lugar kag alyas ‘Chard’, 47-anyos nga taga syudad sang Roxas.
Sa impormasyon nga nakuha sang Bombo Radyo nagikan sa Dumarao Municipal Police Station, ginapahayag nga natigayon nga naaresto ang nasambit nga mga indibidwal pamaagi sa gintingub nga pwersa sang Dumarao Municipal Police Station kag Capiz Provincial Drug Enforcement Unit (PDEU).
Nakuha sa paghinakop sang mga ini ang kapin 300 gramos sang ginaalegar shabu nga may yara sang street value nga P2,040,000.
Samtang, ginakabig sang otoridad nga mga High Value Individual ang nagkaladakpan bangud sa bulto sang shabu nga narekober sa ila nga posesyon.
Nagapangatubang ini sa kaso sa paglapas sa Republic Act 9165 ukon ‘Comprehensive Dangerous Drugs Act of 2002’.
Sa karon, nagapabilin ang mga ini sa kustodiya sang Dumarao Municipal Police Station para sa nagakaigo nga disposisyon.
