ROXAS CITY-Ginsabat sang Municpipal Administrator sa banwa sang Pilar ang pila ka mga reklamo nga ginpalab-ot sang mga pumuluyo nahanungod sa guba nga tulay sa Barangay Dulangan sang nasambit nga banwa.
Suno kay Mr. John Heredia nga napadulungan kag natsekyar na sang pila ka mga nagakaigo nga otoridad gikan sa Capiz Provincial Government ang naguba nga tulay kag nalakip na sa budget ang pagpakay-o diri.
Aminado si Heredia nga wala na sang bastante nga pondo ang Local Government Unit (LGU) sa nasambit nga banwa bangud sa paghatag sang ayuda sa mga residente sang tion nga ginpaidalum sa Enhanced Community Quarantine (ECQ).
Ginpahayag pa sini nga bangud indi makaya sang LGU-Pilar ang budget nga pagpakay-o sang nasamad nga tulay rason nga ginpalapitan nila ang gobyerno-probinsyal agud mahinyuan sang bulig.
Nagpasalig man ang gobyerno-probinsyal nga magabulig ini sa pagpakay-o sang nasamad nga istruktura rason nga ginpainan sang pondo nga P4 milyon.
Dugang pa ni Heredia nga nakadepende sa karon sa gobyerno-probinsyal kun san-o pagasuguran ang pagpakay-o bangud may gin-alokar na nga budget diri.
Matandaan nga nagpromisa si Pilar Mayor Arnold Perez nga pagahatagan sang aksyon ang ginareklamo nga tulay nga naguba kun sa diin nagaserbi nga alagyan sang maga manunodko, ginikanan kag estudyanye padulong sa Dulangan National Highschool.
