CAPIZ – Nakakumpiska sang kapin P50 million pesos nga balor sang iligal nga droga ang Philippine Drug Enforcement Agency (PDEA) kag Philippine National Police sang tuig 2025.
Sa interview sang Bombo Radyo kay Mr. Jury Ricamora, Provincial Officer sang Philippine Drug Enforcement Agency (PDEA) , iya ginpahayag nga sa ila pagpakig-away sa iligal nga droga, nakakuha sila sang 2,321 grams ukon may street value kapin P50 million pesos.
Suno kay Ricamora, ang ini nga tikang nangin posible bangud man sa pagbuligay sang mga kapulisan, local government unit kag sang barangay.
Ang mga nakumpiska nga droga ang iga-presentar sa Korte bilang ebidensya antes nga ipaidalum sa disruption ukon gilayon na nga pagsunog sang amo nga mga substances.
Pahayag pa niya, ila ginaduso nga magpatigayon sang aftercare sa mga madakpan kag makagwa na sa presuhan kaangay sang paghatag sang palangitan-an sa mga ini agud indi na magbalik sa dati nga bisyo.
Ginpasiguro man sang natungdan nga padayon ang serbisyo sang ila talatapan sa pagpabilin sang katawhay sang palibot batok sa iligal nga droga.
INTERVIEWED BY: BOMBO LYND-C JOY BADE
