Gin-evacuate sang mga otoridad ang masobra 1,500 ka mga residente sa mga hotel kag puluy-an sa Crete, Greece matapos nga nagluntad ang wildfire sa bahin sang isla, suno sa report sang Greek fire brigade sang Huwebes, Hulyo 3.
Kapin sa 230 ka mga bombero ang nagabulig agud mapalong ang nagadabdab nga kalayo nga gintawag sang mga otoridad nga “very hard” nga sitwasyon bangud sa dungan nga pagluntad sang sunog sa nagkalain-lain nga bahin.
Isa ka separado nga sunog ang narekord man sa rehiyon sang Halkidiki, sa diin 160 ka mga bombero kag 49 ka mga salakyan sa emerhensya ang nagresponde .
Nagpaandam ang Fire service nga ang pungsod nagasulod sa “pinakadelikado nga bulan” sang panahon sang sunog, nga ang mabaskog nga hangin nagapadasig sang paglapta sang sunog.
Samtang, na-record man ang wildfires sa Germany, partikular sa Saxony kun sa diin duha ang napilasan kag masobra 100 ang gin-evacuate.
Nahibaluan nga ang mga sunog sa kagulangan gina-eksperyensyahan kadungan sang nagapadayon nga tuman ka grabe nga heatwave sa Europa, sa diin ang temperatura ginalauman nga magalab-ot sa tungatunga sang 30s sa mga pungsod pareho sang Espanya, Italya, Austria, Hungary, Slovakia, Poland, kag Croatia.
