ROXAS CITY -Nagapangayo sang bulig ang masobra 50 ka mga construction workers matapos nga wala sila ginapasugtan nga maguha sa ginaconstruct nga nga mall sa Arnaldo Boulevard, Barangay Baybay Roxas City.
Suno ginpalab-ut nga reklamo sang isa ka construction worker sa Bombo Radyo nga halos 3 na sila kabulan nga wala ginapasugtan nga maguha sang ila kontraktor nga Sonyu Construction Corporation sa pihak nga wala na sang lockdown kag yara na Modified General Community Quarantine ang probinsiya.
Ginpahayag ni Manong Demie, isa ka construction worker nga luyag na sang mga kaupdanan sini nga magpauli sa tagsa ka mga kabanwahanan bangud tuman na kabudlay ang ila sitwasyon sa sulod sang ginpatindog nga mall.
Apang wala ini sila ginpasugtan nga makaguha bangud ginakahangaw-an sang ila kontrakor nga malatnan sila sang covid-19.
Gindugang pa ni Manong Demie nga ginapahog pa sila sang kontraktor nga madulaan sang trabaho sa tion nga magpamilit nga maguha sa mall.
Apang nagakahangawa ini sa mga kaupdanan nga nagamalasakit bangud sa tuman ka initon sang ila natulogan.
Magluwas diri, ginasul-ob man sila sang baha sa tion nga magbubu ang mamunog nga ulan.
Samtang nagalaum naman si Manong Demie nga mabuligan kag maaksyunan gilayon sang gobyerno sang syudad ang ila nga problema.
