TACLOBAN CITY – Nagtambong ang kapin sa 9,800 nga turista para sa whale shark interaction program sa banwa sang Pintuyan, Southern Leyte sa sini nga tuig, suno sa lokal nga tourism office.
Nagapakita ini sang padayon nga pagsaka sang bilang sang bisita sa nagligad nga mga tinuig, halin sa 2,040 ka turista sa 2023, 3,894 sang 2024, kag 6,521 sa tuig 2025.
Opisyal nga nagtapos sang Hunyo 1 ang 2026 whale shark interaction season agud hatagan sang tion ang mga butanding nga magmigrar kag makabawi ang marine ecosystem.
Suno kay Edilberto Alapag, tourism officer sang Pintuyan, bisan suspendido anay ang whale shark interaction tours, mahimo gihapon nga ma-enjoy sang mga turista ang iban pa nga attraction pareho sang pygmy squid catching sa port, jigging, daytime spearfishing, snorkeling, diving, mountain trekking, magbisita sa duha ka waterfalls, kag trips sa Mount Caningag Resort.
Ginpahayag man sang mga opisyal nga dako ang nabulig sang turismo sa ekonomiya sang banwa, ilabi na matapos maapektuhan sang bagyo ang pangisdaan kag pangabuhian sang mga residente.
Dugang pa sa impormasyon, madamo nga manugpangisda kag mangunguma ang nakakita sang bag-o nga pagkakitaan bilang whale shark spotters, tour guides kag boat operators, samtang ang iban nga anay naga-engage sa iligal nga pagpangisda ang nangin bantay sa marine resources.
Sa karon ang whale shark interaction program sa Pintuyan nahibaluan nga nagsugod pa sang 2013 kag padayon nga ginakabig nga isa sa mga nangapannguna nga eco-tourism attractions sa Southern Leyte.
