ROXAS CITY – Ginsabat sang provincial coordinator sang isa ka non government organization (NGO) ang alegasyon sang pila ka mga indibidwal nga isa ka sahi sang scam ang ila nga grupo nga nagapangrecruit sang tawo kag pagpanukot sang P25 sa sin-o nga luyag magpamiyembro.
Personal nga nagpadulong sa Bombo Radyo ang provincial, municipal kag barangay coordinators sang Kapisanan ng mga Katutubong Mamamayan ng Maharlika Incorporada (KKMMI) agud klaruhon ang pangalan sang ila nga organisasyon kasunod ang pagpresentar sang mga programa nga ma-avail sang ila mga miyembro.
Ginpahayag ni Mr. Efren Lozada, provincial coordinator sang KKMMI may yara sila sang pito ka mga priority programs nga bukas sa tanan nga ila miyembro.
Ginapanindugan ni Lozada nga legal ang ila nga organisasyon kag may accreditation sila gikan sa Securities and Exchange Commission (SEC).
Suno pa diri nga natukod ang KKMMI agud mabuligan nga makaangkon sang palangabuy-anan ang mga pumuluyo nga indi na masarangan suportahan sang gobyerno.
Nahibaluan nga gikan ang pondo sang organisasyon sa UN International pinaagi sa Central Bank sa diin wala na ginapaagi sa mga pulitiko, agud masiguro nga direkta nga mabaton sang tawo ang bulig.
Ginpabugal man ni Lozada ang endorsement gikan sa palasyo sang malakanyang sa matag-as nga opisyal sang organisasyon, gani indi sila matawag ng peke.
Liwat nga ginpanindugan ni Lozada nga optional kag indi compulsory ang luyag nga magpamiyembro sa ila grupo.
Samtang suno diri nga wala sila nagapangulekta kabaliktaran sa nagalapta nga balita.
Ginklaro sini nga ang P25.00 nga kantidad ang bayad sa ginapa-photo copy nga application form sang mga tawo nga luyag mag-apply.
