ROXAS CITY – Wala nagapamalabag si Punong Barangay Alfredo ‘Minong’ Albaladejo sa plano sang gobyern-probinsiyal nga himuon nga quarantine facility sang mga ‘asymptomatic’ patients sang coronavirus disease (COVID-19) ang Capiz Gymnasium sa Villareal Stadium sa Barangay Tiza, Roxas City.
Suno kay Albaladejo nga wala siya sang poder agud magpamalabag sa amo nga plano bangud propeidad sang gobyerno-probinsiyal ang amo nga pasilidad.
Ginpahayag sini nga para sa iya, maayo gid nga himuon nga quarantine facility ang amo nga pasilidad bangud isolated ini kag malayo sa pamalay sang mga tawo.
Magluwas sa malapad nga espasyo suno sa iya, masiguro pa nga indi makaguwa ang mga pasyente nga ipahamtang diri bangud malayo ang distansiya kag mataas ang perimeter fence.
Indi man ini pwede balibaran suno kay Albaladejo bangud suno diri, indi pwede nga i-diskriminar ang mga pasyente sang amo nga balatian.
Importante man suno diri sa karon nga panahon sang pandemiya kag krisis ang pagbuligay sang tagsa-tagsa gani handa ini nga magbulig.
Nagpangabay man ini sa mga pumuluyo sang Barangay Tiza nga kuntani mas mangin ma-intiendihon sila sa katuyuan sang amo nga plano.
Suno diri nga indi man mabutang sa peligro ang ikaayong-lawas sang mga pumuluyo bangud may mga pagsulundan man sa paghimo bilang quarantine facility sa amo nga lugar.
Nakahanda man si Albaladejo nga pamatian ang sentimyento sang mga pumuluyo natuhoy sa amo nga plano apang suno diri kinahanglan nga edukaron ang mga ini natuhoy sa amo nga balatian agud ila mas mahangpan ang transmission sang virus.
