ROXAS CITY – Nagdepensa si Punong Barangay Sioly Andrade sang Barangay Bolo, Roxas City natuhoy sa pagpahanugot sini sa pagsulod sang misis kag mga kabataan sang isa ka Locally-Stranded Individual (LSI) nga naka-quarantine sa ila nga quarantine facility.
Suno kay Andrade nga makaisa lamang ka beses niya ginpasugtan nga makasulod ang misis kag mga kabataan sang lalaki nga LSI bangud sa hinyo man mismo sang pamilya.
Ginpahayag sini nga nagpasugot siya bangud nagpahayag ang misis kag mga kabataan sini nga nahidlaw na sila sa nasambit nga LSI.
Aminado man si Andrade nga ang pamilya mismo sang naka-quarantine nga mga LSI’s sa ila barangay ang nagadul-ong sa ila sang pagkaon adlaw-adlaw bangud ang pasilidad lamang ang masarangan nga mahatag sang barangay.
Suno diri nga may nagadaho lamang nga opisyales sang barangay ang ginadul-ong nga pagkaon apang sang naghinyo ang misis sang nasambit nga LSI, ginpasugtan sila nga makasulod sang makadali.
Ginklaro man ni Andrade nga wala na naliwat pa ang amo nga insidente kag hugot na nga ginabawalan nga makasulod ang pamilya sang mga LSI’s.
Kumbinsido man si Andrade nga negatibo sa coronavirus disease (COVID-19) ang nasambit nga LSI bangud naghalin ini sa Marawi City apang nahangpan man sang opisyal ang importansiya sang pagpaidalom sa 14-day quarantine period.
Mahibaluan nga nagreklamo ang pila ka residente sa barangay bangud sa pagpahanugot ni Andrade nga makasulod sa quarantine facility ang pamilya sang nasambit nga LSI.
