ROXAS CITY – Daily monitoring sa mga Person’s Under Monitoring (PUMs) ang hugot nga ginapatuman sang pamunuan sang Barangay Libas sa pagpanguna sang ila punong barangay agud masiguro nga indi maglapta ang coronavirus disease (COVID-19) kag ma-proteksyunan ang mga pumuluyo.
Ginpahayag ni Punong barangay Richard Arrojado nga ginhatagan sang thermometer ang kada isa sa pito ka mga PUMs agud matsekyar ang ila body temperature kada adlaw .
May gin-assign man nga mga barangay kagawad adlaw adlaw nga maga-monitor sa kondisyon sang mga PUM’s.
Ginpalab-ot man sang opisyal sa mga PUMs nga sundon lamang ang iya pangabay nga magtenir sa ila mga balay kag indi magguwa, agud malikawan ang paglapat sang COVID-19.
Nagpaandam pa si Arrojado nga sa tion nga iya makit-an nga magguwa sa balay ang mga PUMs, indi siya magpangduha duha nga piangon ang mga ini.
Nagpamat-ud man si Kapitan Arrojado nga pananglitan nga may PUM sa ila barangay nga magsuprer sang hilanat kag makaangkon sang flu like symptoms kasubong sang COVID-19, wala ini sang mahimo kundi maglisensiya sa pamunuan sang eskwelahan sa Barangay Libas nga gamiton ang buluthuan agud didto pateniron ang PUM nga nagalain ang pamatyag, agud ma-isolate na ini sa kadamuan.
Pabilin ini sa iya panindugan sa gobyerno sang syudad nga kun mahimo tingubon na lamang ang tanan nga mga PUMs sa isa ka lugar agud tingub man ang pagtatap sa ila.
Samtang patigayunon sa Sabado nga adlaw ang distribusyon sang relief goods sa mga residente sang Barangay Libas.
