ROXAS CITY – Nagpaathag sa karon ang punong barangay sang Barangay Bago, Roxas City angut sa pagpatambak sang buga sa dalan sa ila barangay nga masami ginahimo lakturan sang mga salawayon nga indibidwal nga wala nagaagi sa border security checkpoint.
Ginpahayag ni Kapitan Ely Azarraga nga wala sang ginpahamtang nga tanod sa lugar bangud magluwas nga gamay lamang ang ila mga CVO, nag-augment pa sila sa nagapatigayon sang border security control sa Barangay Adlawan.
Suno pa sa opisyal nga natigayon na nila nga mapalab-ot sa alkalde sang syudad ang problema sa diin nagpanugyan ini nga pahamtangan sang buga agud indi ini magamit nga alagyan sang mga salawayon nga mga motorista nga indi luyag mag-agi sa pagsulundan sang gobyerno.
Ginpanindugan pa ni Kapitan Azarraga kun kuhaon ang buga kag ang ginpahamtang nga kawayan, sigurado nga liwat ini pagaagyan sang iban nga mga motorista kag mabutang sa peligro ang kabuhi indi lamang sang mga taga Roxas City kundi kalakip sang kabanwahanan nga padulungan sang pasaway nga mga persona.
Nagpangabay man ini nga indi pagtugdaan sang ila pagahimoon bangud nagasunod lamang sila sa direktiba sang alkalde.
Samtang suno kay Kapitan Azarraga nga indi lamang ang Barangay Bago ang nagpatambak sang buga agud indi na malakturan kundi kalakip man ang Barangay Loctugan kag Tanza.
