ROXAS CITY – Ginbali sang punong barangay sang Barangay Culajao, sining syudad ang alegasyon nga ginpatuto sa iya sang isa ka residente nga nagtuga ini sang kinagamo sa ila nga barangay.
Ginpahayag ni Kapitan Floyd de Jose nga kasubong napuno na ini sa pagpasaway sang pila ka mga residente nga nagalapas sa pagsulundan nga magtenir sa ila balay kag likawan ang pagtipon tipon, agud indi maglapta ang coronavirus disease (COVID-19).
Suno sa opisyal nga nagsugod lamang ang insedente sang madamo na ang nagapalupad sang burador sa diin ginahimo nga tambayan ang mga tapangko sang mga nagabaligya sa Barangay Culajao.
Aminado si de Jose nga ginwasak sini ang mga tapangko sang mga negosyante bangud ini ang nagaserbe nga tambayan sang mga residente.
Gintuad pa sang opisyal nga makapila ka beses nga ginsaway ang mga salawayon nga residente sang naga-roving nga mga tanod, apang matapos nga makabiya ang mga CVO sa lugar, liwat nagatumpok ang mga ini.
Ginpanginwala man sini ang alegasyon nga nagpangmulay siya bangud bilang kristiyano wala ini nagapangmulay.
Ginhangkat man sini ang nagareklamo nga magkadto sa barangay hall kag magbayluhanay sila sang pwesto agud ila mahibaluan kun ano ka budlay nga magpabalik balik saway apang ginasupat lamang.
Ginpalab-ot man sini sa mga nagabaligya nga mahimo sila makabaligya sang ila mga produkto apang kinahanglan lamang nga ila himuson ang mga tapangko kun tapos na sila baligya agud indi ini pagtambayan.
Ginpahanumdum man ni de Jose nga pananglitan ma-lockdown ang ila barangay makaluluoy kag magutuman gid ang mga pumuluyo.
