ROXAS CITY – Ginpamatud-an sang punong barangay sa Barangay Tanque, sining syudad nga kilala nga nagaduso sang droga sa ila lugar ang nadakpan sa drug buy bust operation nga si John Micheal Labesora 18-anyos.
Ginpahayag ni Kapitan Herminia Dillo nga madamo na ini sang nabaton nga impormasyon nga si Labesora ang nagasupply sang droga sa pila ka nagagamit sang iligal nga droga sa lugar.
Gani sang nahibaluan nga nadakpan na ini sang kapulisan, nalipay ang punong barangay bangud mapahagan hagan na ang pagsulod sang droga sa ila barangay.
Nahibaluan pa gikan kay Dillo nga wala man sila nagakulang sa pagpahanumdum kay Labesora sa diin masami ginabisita sang mga barangay health workers kag social worker ang balay sini agud tsekyaron kun gin-untatan na sini ang iligal nga buluhaton.
Apang kasubong nga wala ini nagbag-o kag mas naglala pa bangud matapos nga nakaguwa sa crisis center, ginpadayon sini ang iya nga iligal nga aktibidad.
