ROXAS CITY – Nagapanindugan si Barangay Kapitan Ricky Donato sang Mongpong nga indi sini pag pag-agyon kag magapabilin ini nga sirado ang dalan sa tion nga mag-agi ang pamilya Baniabo sa pribado nga lote.
Sa interview sang Bombo Radyo kay Donato nga iya ginpakamaayo nga saraduhan ang dalan para indi makaagi ang pamilya ni Rosemarie Baniabo agud malikawan nga mag-abutay kag mag-away ang duha ka pamilya nga nagsugod lamang sang nagligad nga tuig, nga kun sa diin na-rekord man ini sa barangay kag ang nag-umpisa sa amo nga gamo amo ang pamilya Baniabo.
Dugang pa ni Donato nga wala ini sang kahilabtanan kun nakastiguhan ang iya nga bana kag nagapati ini nga bangud pa ini sang ila sadto nga indi pag-intindihanay.
Ginpanginwala man ni Donato nga naglain ang iya buot kay nagkuntra sa iya ang pamilya Baniabo kay natapus na ang eleksyon. Suno kay Donato, wala diri sang labot ang pulitika.
Sa ulihi, ginpanugyanan ni Donato nga kun indi man nila mahusay sa barangay ang ila problema, mahimu ini nga makapasaka sang kaso kag mas maayo nga magsaylo nalang sang ila nga ilistaran kay madamu na sang wala nanamian sa ila nga mga kalapit-balay..
Handa naman nga atubangon ni Donato kun anu man nga reklamo ang ipasaka ni Baniabo batuk sa iya.
