ROXAS CITY – Gindepensahan sang kapitan sang Barangay Bating, sa banwa sang Mambusao ang kaugalingon batuk sa mga nagalapta nga laragway kag negatibo nga komento sa social media site nga Face Book sang mga netizen matapos nga nakita ini nga kaupod ang nagpositibo sa COVID-19 sa Metro Manila.
Ginpahayag ni Punong Barangay Joefred Sheen Jumbas nga naghatag ini sang paathag agud matinluan ang iya pangalan bangud bisan paano naka-apekto ang sala nga impormasyon sa iya kag sa iya pamilya.
Suno kay Jumbas nga indi sila personal nga magkakilala sang COVID-19 patient nga residente sang banwa sang Jamindan, apang natabuan nga nagkita sila sa pagtililipon sang Philippine Councilor’s League sa Manila kag nagpakuha sang laragway.
Apang ginklaro sang punong barangay nga wala nagdugay ang ila nga pag-upod sang amo nga persona bangud nagpauli ini sa probinsiya sang Marso 1 akg nagtambong sa pila ka mga hilikuton.
Sa matandaan pa sang opisyal nga wala ini nagsuprer sang hilanat humalin nga nag-abot sa Manila kabaliktaran sa napagkit sa FB.
Aminado si Jumbas nga ginkasubo sini ang mga sala nga akusasyon sang pila ka mga persona bangud siya bilang barangay kapitan, nagatinguha nga maproteksyunan ang mga pumuluyo sang Barangay Bating batuk sa COVID-19.
Nahibaluan nga isa sa duha ka mga persona nga nagpalapta sang impormasyon nga may lagnat ini kag posible nga nalatnan sang coronavirus disease 2019 ang nagpangayo na sang public apology sa iya,
Apang natabo na ang insedente kag bisan paano nabutang man sa kahuy-anan ang ila pamilya bangud posible nagdumdum ang iban nga matood ang yara sa facebook.
Agud pamatud-an nga wala ini sang anuman nga masakit nga ginasuprer kag healthy ini, adlaw adlaw siya nga nagaupod sa border checkpoint sa ila barangay agud masiguro nga indi makasulod ang COVID-19 sa ila nga barangay.
