ROXAS CITY – Ginpanginwala sang punong barangay sang Barangay Sta. Cruz, Ivisan, Capiz ang alegasyon nga nagmandu ini sa iya mga barangay kagawad kag barangay health workers (BHW’s) nga pang-ibanan sang P1, 000 ang P6, 000 nga nabaton nga ayuda sang mga benepisyaryo sang Social Amelioration Program (SAP) sang Department of Social Welfare and Development (DSWD).
Suno kay Punong Barangay Nicasio Ralph ‘Bubot’ Muñoz, lunsay wala sang kamatuoran nga nagmandu siya nga pang-ibanan ang kwarta sang mga SAP beneficiaries bangud nahangpan niya nga nagasupak ini sa pagsulundan sang DSWD.
Suno diri nga kun matuod ang alegasyon batuk sa iya, kuntani nakuhaan ini sang laragway sang mga tawo ukon nagreklamo sila sang tion nga gina-ibanan ang ila nabaton nga ayuda.
Apang ginpahayag sini nga base sa iya nahibaluan, may pipila ka mga SAP beneficiaries nga boluntaryo nga ginapartehan ang ila kakilala sang ila nabaton nga ayuda.
Kadungan sang pagdepensa ni Muñoz sang ini ang gina-interview, padayon naman ang pag-alabutan sang mensahe sa Bombo Radyo sang pila ka mga residente nga nagapamatuod nga may natabo gid nga pagpang-iban sang nasambit nga ayuda sa mga SAP beneficiaries sa amo nga barangay.
Sa pihak nga bahik, nagdepensa man si Muñoz natuhoy sa alegasyon sang isa ka 4P’s beneficiary nga nagreklamo sa pulisya bangud ginaalegar nga iya ini gintapungol.
Suno diri nga ginsita niya lamang si Jimmy Barrios bangud sa pagkuha sang mga laragway sa pag-release sang ayuda sa mga SAP beneficiaries kag ini ang ginpaguwa sa kudal sang barangay hall.
Apang bangud nagatenir gihapon sa alagyan sang tawo, liwat ginpalapitan ni Muñoz si Barrios kag ginsita apang wala suno diri sang pagpanumbag nga natabo.
