ROXAS CITY – Gintawag sang Barangay Kapitan ang atensyon sang iya mga barangay tanod nga ginapahayag kalakip sa mga nagapatigayon sang pagsugal sa Sitio Asag, Barangay Lonoy, banwa sang Sapian.
Sa interview sang Bombo Radyo kay Barangay Kapitan Pancho Orario sang nasambit nga barangay, ginpahayag sini nga wala man sang may nagpalab-ot sang kasubong sini nga reklamo sa iya opisina kun sa diin ginahimo pa nga sugalan ang waiting shed nga nahamtang malapit sa eskwelahan.
Suno kay Orario, wala niya ginatolerar ang iligal nga buluhaton sa iya nasakupan kag hugot ang ila pagpangampanya kontra sa illegal gambling.
Matandaan, may isa ka concerned citizen nga nagpalab-ot sang reklamo sa Bombo Radyo kag ginapahayag nga ginahimo nga sugalan sang pila ka mga pumuluyo ang waiting shed sa ila barangay kag masami niya nakikita ang pila ka mga tanod nga nagasugal man.
Ginpasalig naman ni Orario nga indi na maliwat ang nasambit nga buluhaton kag kun may madakpan sila nga nagapatigayon sang pagsugal iya ini ipadakop sa mga kapulisan.
Nagapangabay man ang punong barangay sa mga pumuluyo nga kun may yara sila sang nahibaluan nga nagapatigayon sang mga iligal nga buluhaton, gilayon ini nga ipalab-ot sa iya talatapan agud madasig nga maaksyunan.
