Ginsabat ni punong barangay Martin Antonio ‘’Nognog’’ Pimentel ang reklamo kag akusasyon sang ila man residente sa Barangay 1, nga nagatenir sa day care center sang barangay.
Ginpahayag ni Kapitan Pimentel nga makapila na ka beses nga gin-notify ang pamilya ni Mary Grace Hari-on angut sa ila nga pagbakante sa day care center nga ila ginteniran matapos nga masunugan sang puluy-an sang bulan sang Enero sini nga tuig.
Apang indi pagbatunon sang ginang ang nasambit nga notification sang barangay nga nagaguha nga kasubong ginabalewala sini ang resolusyon nga gindihon sang barangay council.
Ginklaro man sang opisyal nga indi lamang siya ang nagdesisyon kundi kaupod sini ang bug-os nga konseho, magluwas pa sa pila ka mga reklamo nga nabaton gikan sa mga pumuluyo nga ila lamang ginapasugtan ang pagtenir sa ila nga day care center rason nga naghimo na ini sang tikang pinaagi sa pagnotify sa natungdan nga dapat bakantihon na nila ang nasambit nga lugar.
Nagapati si Kapitan Pimentel nga nagakaigo na ang lima ka bulan nga pagtenir sa day care center para may mahalinan sila nga balay.
Kun tan-awon mahimo na nga ma-estaran ni Hari-on ang ginpatindog nila nga balay bangud may atup na ini.
Ginapanindugan man sini nga indi siya mahambalan nga inhumane sa ginahimo sini sa karon bangud bastante na ang lima ka bulan nga ila pag-estar sa day care center para makapangita sang ila kaugalingon nga puluy-an.
Ginkumpirma man ni Kapitan Pimentel nga siya ang nagpa-utod sa kuryente sa day care center, bangud sa iya pagpati nga kun indi sini pag-ipa-utod ang kuryente, indi man magbiya ang pamilya Hari-on.
Samtang apisar naga-share man sa balayaran sa kuryente ang pamilya Hari-on, suno sa punong barangay indi ini rason para pabayaan na lamang sila sa pag-estar sa amo nga facilidad bangud dapat sundon ang desisyon sang barangay council nga ila na i-vacate ang lugar.
