PONTEVEDRA, CAPIZ -May duha na lamang ka mga vendors nga nabilin sa old public market sa Barangay Hipona, Pontevedra, Capiz nga nagabaligya kag kadam-an ang nagtransfer na sa bag-o nga Hipona Public Market sa Crossing Texas sang nasambit nga barangay.
Sa pagpadulong sa lugar sang Bombo News Team, nakita nga madamo na sang mga vendors nga nagpahamtang sang ila produkto sa bag-o nga merkado sang Barangay Hipona.
Ginpahayag ni Manong Efren nga nagsugod ini sa pagbaligya sang nagligad nga Sabado sa opening day mismo.
Suno diri nga siya mismo ang naghinyo kay Kapitan Resty Oquendo nga magbaligya sa bag-o nga merkado publiko kag ginakumbinse ang kilala nga mga vendors nga mag-upod sa iya.
Ginpabugal man sini ang promesa ni Kapitan Resty Oquendo nga wala sila sang bayaran sa gina-ukupahan nga pwesto sa sulod sang isa ka tuig.
Samtang gindepensahan naman ni Kapitan Resty Oquendo ang kaugalingon batuk sa alegasyon nga pagharass sa mga vendors sa old public market sang nagligad nga Sabado, matapos nagpakatig-a ang mga ini nga magtransfer sa bag-o nga public market.
Suno sa punong barangay nga wala sang kamatuoran nga may harassment nga natabo kag ginapakalain lamang ini.
Ginpanindugan man sini nga wala niya ginpahalin kundi ginpasugtan sini ang mga vendors nga magbaligya sa old public market kag may yara ini sang pamatood.
Ginpahayag pa ni Oquendo nga may paglapas man nga nakomiter ang vendor nga si Merlinda bangud nagpatindog ini sang balay sa mismo old public market sang Hipona kag ang CR nga para kuntani sa tanan, ang nangin exclusive na lamang sa ila pamilya.
Ginkumpirma man sang opisyal nga magapasaka ini sang kaso nga libel sa indibidwal nga yara sa likod sa pagguba sa iya pangalan kag nagadabok sa nagakontra sa iya bangud apektado na ang iya pamilya sa mga sala nga akusasyon.
