ROXAS CITY – Kasubong nga gina-ekspektar na sang punong barangay sang Barangay Milibili nga indi malakip ang ila barangay sa TOP 20 Barangays sa 2019 Barangay Excellence in Local Governance (Barangay Excell) sang Department of Interior and Local Government (DILG).
Ginpahayag ni Kapitan Annabelle Roxas, isa ka rason nga wala sila malakip sa Barangay Excell amo ang kapaslawan sang nagligad nga administrasyon nga matugyan sa ila ang nagakaigo nga dokumento humalin sang 2018 kag una nga semester sang tuig 2019.
Ini nga mga dokumento ang ginapangita sang DILG nga magasuporta kuntani sa Barangay Milibili sa ila nga pagpasakup sa amo nga evaluation.
Ginbuyagyag pa ni Kapitan Roxas nga sa iya pagpungko sa pwesto sang Hulyo 1, 2019, wala sang papeles nga gintugyan sa ila ang nagligad nga administrasyon kag gin-delete man ang tanan nga files sa PC nga pagpakita lamang sang pagsabotahe sa bag-o nga administrasyon.
Gintuad pa sang opisyal ang madamo sang problema nga iya naabtan sa pagpungko bilang punong barangay sang Milibili.
Kalakip diri ang kapaslawan sang nagligad nga administrasyon nga makabayad sang ila electric bill sa sulod sang apat ka bulan.
Nahibaluan nga humalin sang Marso-Hunyo sini nga tuig, may electric bill nga wala nabayaran ang administrasyon sadto ni anay Punong Barangay kag karon City Councilor Midelo Ocampo nga nagalab-ot sa P94,000.
Water bill sa MRWD nga nagalab-ot man sa P8,000 sa sulod sang apat ka bulan, internet connection nga nagalab-ot sa P4,500.
Ginpahayag ni Roxas nga ginbayaran sini ang mga kautangan nga ginbilin sa ila sang nagligad nga administrasyon agud indi sila mautdan sang tubig kag kuryente kag mangin tayuyon ang paghatag serbisyo sa mga pumuluyo.
