ROXAS CITY – Gintawag nga inosente ni Kapitan Arthur Aragon sang Barangay Cagay sining syudad ang 21-anyos nga estudyante nga nadakpan sa ginpatigayon nga drug buy bust operation sa Sitio Bliss, Barangay Cagay sang Domingo nga adlaw.
Ginpahayag ni Punong barangay Aragon nga wala sang kun anuman nga rekord sa ila barangay si Prince Dave Doncillo kag kilala ini nga mabuot nga bata nga wala sang bisyo ukon wala nagabarkada.
Makabig sang opisyal nga planted ang natabo nga operasyon bangud inosente sa mga akusasyon nga pagduso sang iligal nga droga si Doncillo kag posible nga nataymingan lamang nga yara siya sa balay sa diin nagatenir ang subject person nga si Jocelyn Cabisilla rason nga ini ang naabtan sang mga pulis .
Nahibaluan nga sang Enero 5, 2021 lamang nag-abot sa Barangay Cagay si Doncillo gikan sa Metro Manila sa diin na sila nagatenir sang iya pamilya.
Samtang ginkumpirma ni punong barangay Aragon nga kilala nga nagaduso sang iligal nga droga si Cabisilla kag sa pinakaulihi nga impormasyon nga nakuha nagpauli ini sa Kalibo dala ang lima ka mga kabataan.
