ROXAS CITY – Indi pabor ang punong barangay sang Barangay Tiza, sining syudad nga makaangkon sang eleksyon kag ilisan ang tanan nga nagapungko nga opisyales sang Liga ng mga Barangay Roxas City chapter.
Ginpahayag ni Kapitan Alfredo ‘’Menong’’ Albaladejo nga dapat ang bakante lamang nga posisyon ang pa-eleksyunan matapos nga nagdaug ang apat ka mga punong barangay sang nagpadalagan sila sa pagka konsehal sang syudad sang Roxas sang May 13, 2019 election.
Kalakip sa bakante nga posisyon sa Liga amo ang vice president kag tatlo ka mga board of directors matapos nagdaug sanday Jericho Celino, Midelo Ocampo, Moring Gonzaga kag John Paul Arcenas sang nagpapili sila sa pagka city councilors sa Roxas City.
Wala sang nakita nga rason si Albaladejo para ilisan ang nagapungko nga Liga ng mga Barangay President nga si Virgilio ‘’Yoyo’’ Santos, bangud wala sang anuman nga reklamo ukon petisyon batuk sa pagdumala sini sa asosasyon.
Bug-os ang pagpati ni Albaladejo nga may lamud pamulitika ang tuyo nga pag-ilis kay Santos, bangud tobtob sa karon may faksyon sa gihapon sa asosasyon sang mga barangay kapitan.
Nagpangabay man ini sa mga kaupod nga punong barangay nga indi paggub-on ang ila nga relasyon bangud ginasaligan sila sang mga pumuluyo nga magaserbe nga tingog sang kadam-an.
