ROXAS CITY – Nagpaathag ang punong barangay sang Barangay Jolongajog, Pontevedra, Capiz natuhoy sa liwat nga pagpang-picture sang mga benepisyaryo sang Social Amelioration Program (SAP) nga may gina-uyatan nga P6, 000 bilang pamatuod nga sila ang nakabaton sang amo nga ayuda.
Suno kay Punong Barangay Ramon Dunton nga ang ini nga mandu ang gikan mismo sa Municipal Social Welfare and Development Office (MSWDO) sang nasambit nga banwa bangud indi sang ensakto ang ila una nga kuha nga mga laragway sang pag-release sang ayuda sadtong Abril 23.
Suno diri nga wala man sadto sang klaro nga pagsulundan nga ginhatag ang MSWDO kun ang ang dapat nga posisyon sang pagkuha sang picture sa isa ka benepisyaryo.
Suno diri nga sa ila nga releasing, may mga benepisyaryo nga indi sang ensakto ang ila nga kuha nga laragway kag may mga nagasuksok pa sang face mask.
Bangud diri suno sa iya, ginmanduan sila sang MSWDO nga liwat nga kuhaan sang laragway sa sari-sari nga anggulo ang mga benepisyaryo nga may gina-uyatan nga ginpitad nga kwarta kag SAP form.
Ginkompirma man ni Dunton nga may mga benepisyaryo nga nagpakatig-a nga indi magpakuha liwat sang picture bangud sa nagalapta nga estorya nga may yara pa sang palaabuton nga 2nd tranche sang nasambit nga ayuda.
Apang suno diri wala pa siya sang may nabaton nga impormasyon nga may ikaduha nga hugna ang nasambit nga bulig-pinansiyal.
